Рамазан ае 27 майда башлана

Кичә ТҖ МДН Пленумында ачык сайлаулар нәтиҗәсендә, ТР мөселманнарның Диния нәзарәте Президиумына 15 әгъза билгеләнде. Алар арасында: Камил хәзрәт Сәмигуллин, Рөстәм хәзрәт Вәлиулин, Җәлил хәзрәт Фазлыев, Рәфыйк Мөхәммәтшин, Мансур Җәләлетдин, Әлфәс Гайфуллин, Илфар Хәсәнов, Айрат Әюпов, Илдар Баязитов һәм башкалар бар иде. Пленум утырышында шулай ук Голәмәләр, Казыйлар һәм Аксакаллар Шураларының яңартылган составлары кабул ителде.

Моннан тыш, Пленумда Рамазан тәртипләре турында хәбәр ителде: агымдагы елда ул 27 майда башлана. Беренче Тәравих намазы республика мәчетләрендә 26 майда укыла. 25 июньдә – гает бәйрәме көне. Фидия сәдакасы - 200 сум. Зәкят түләү өчен нисаб күләме - 198 000 сум. Фитыр сәдакасы - 100 сум.

Пленумда шулай ук мәчетләрне һәм зиратларны теркәү, уку йортларына абитуриентлар туплау һ.б. мәсьәләләр карадылар.